HTV News, 20-Feb-2026: తెలంగాణలో టిమ్స్ (తెలంగాణ ఇన్స్టిట్యూట్ ఆఫ్ మెడికల్ సైన్సెస్) ఆస్పత్రుల పనులు వేగవంతం చేశారు. సనత్నగర్ టిమ్స్ ప్రారంభానికి సిద్ధంకాగా.. అల్వాల్, ఎల్బీనగర్ టిమ్స్ పనులు కూడా వేగంగా సాగుతున్నాయి. అల్వాల్ టిమ్స్ పనులు ముగింు దశకు వచ్చాయి. వీలైనంత త్వరగా ఈ పనులు కూడా పూర్తి చేసి.. అతి త్వరలోనే ఆస్పత్రిని ప్రజలకు అందుబాటులోకి తీసుకురావాలని ప్రభుత్వం భావిస్తోంది.
తెలంగాణలో పేదలకు అత్యాధునిక సూపర్ స్పెషాలిటీ వైద్య సేవలు అందించేందుకు టిమ్స్ (తెలంగాణ ఇన్స్టిట్యూట్ ఆఫ్ మెడికల్ సైన్సెస్) ఆస్పత్రులు సిద్ధమవుతున్నాయి. ఈ మేరకు హైదరాబాద్ శివారులోని మేడ్చల్-మల్కాజిగిరి జిల్లా అల్వాల్లో కూడా టిమ్స్ ఆస్పత్రి పనులు వేగవంతం చేశారు. అల్వాల్ టిమ్స్ ఆస్పత్రిని దాదాపు రూ.1,196 కోట్ల అంచనా వ్యయంతో నిర్మిస్తున్నారు. ఈ టిమ్స్ ఆస్పత్రి 12 లక్షల చదరపు అడుగుల విస్తీర్ణంలో నిర్మిస్తున్నారు. ఈ టిమ్స్ సూపర్ స్పెషాలిటీ ఆసుపత్రిలో వెయ్యికి పైగా పడకలు అందుబాటులోకి రానున్నాయి.
వైద్యారోగ్యశాఖ అధికారులు వచ్చే నెలలోనే టిమ్స్ ఆస్పత్రిని రోగులకు అందుబాటులోకి తేవాలని భావిస్తున్నారు. అల్వాల్ టిమ్స్ ఆస్పత్రి భవన నిర్మాణం ప్రస్తుతం చివరి దశలో ఉంది. ఆస్పత్రికి సంబంధించిన విద్యుత్తు, ప్లంబింగ్ పనులు చేస్తున్నారు. అత్యాధునిక వైద్య సదుపాయాలతో కూడిన ఈ సూపర్ స్పెషాలిటీ ఆసుపత్రి అందుబాటులోకి వస్తే హైదరాబాద్తో పాటుగా శివారు ప్రాంతాల ప్రజలకు ఎంతో ఉపయోగంగా ఉంటుంది.. నాణ్యమైన వైద్యసేవలు అందుబాటులోకి వస్తాయి అంటున్నారు.
కొత్త టిమ్స్ ఆస్పత్రులు సనత్ నగర్, అల్వాల్, ఎల్బీ నగర్లో నిర్మిస్తున్నారు. సనత్నగర్లోని టిమ్స్ ఆస్పత్రిలో వెయ్యి పడకలతో.. రూ.968 కోట్ల సవరించిన అంచనా వ్యయంతో 53 ఎకరాల విస్తీర్ణంలో నిర్మిస్తున్నారు. అల్వాల్లోని టిమ్స్ ఆస్పత్రిని వెయ్యి పడకలతో.. 28 ఎకరాల్లో రూ.1,049 కోట్ల సవరించిన అంచనాలతో నిర్మాణం చేస్తున్నారు. ఎల్బీనగర్ టిమ్స్ ఆస్పత్రిని 21 ఎకరాల్లో రూ.1,011 కోట్లతో నిర్మిస్తున్నారు. తెలంగాణ ప్రభుత్వం పేదలకు కార్పొరేట్ స్థాయి సూపర్ స్పెషాలిటీ వైద్యాన్ని పూర్తి ఉచితంగా అందించే లక్ష్యంతో ప్రతిష్టాత్మకంగా ఈ టిమ్స్ ఆస్పత్రుల్ని ఏర్పాటు చేస్తోంది.
మరోవైపు సనత్నగర్ టిమ్స్ ఆస్పత్రి ప్రారంభానికి సిద్ధమైంది.. ఉగాది పండుగ రోజున టిమ్స్ ఆసుపత్రిని ప్రారంభించి ప్రజలకు అంకితం చేయాలని ప్రభుత్వం నిర్ణయించిన సంగతి తెలిసిందే. 1000 పడకలతో ఈ ఆస్పత్రిని నిర్మించారు. ఈ ఆస్పత్రిలో అత్యంత కీలకమైన 16 ఆపరేషన్ థియేటర్లను నిర్మించారు. ఓపీ రూమ్లు, ఇన్పేషెంట్ డిపార్ట్మెంట్లు, వార్డులు, డయాగ్నస్టిక్స్, ఆపరేషన్ థియేటర్లు, ఐసీయూలు ఉన్నాయి.